Rampignar ed ir culs skis es eir amo pussibel ill’ota età da passa 85 ons

Nesa Engler es üna duonna impreschiunanta. Bricha da statura – ella es üna persuna fich fina cun üna vusch ed anim propi amabels – però tant daplü dal cuors da vita. Nada es ella dal 1928 a Tarasp ingio ch’ella ha eir passantà sia infanzia. Ella s‘ha maridada ed insembel cun seis hom han els trat sü quatter uffants. Vivü han els in differents lös giò la Svizra Bassa. Il viagiar es stat adüna üna paschiun da Nesa. Insembel cun seis hom han els passantà adüna darcheu fich bellas vacanzas in Italia. Cun 56 ons s’ha ella separada da seis hom. Là s’ha, dad üna vart serrà per ella üna porta però a listess mumaint s'ha drivida ün’otra. Quist fat intuna ella adüna darcheu cur ch’ella raquinta da sia vita. Da quista seguonda part da sia vita gnina a savair alchet daplü.

Davo seis divorzi es Nesa ida a star ad Unterseen/Interlaken, ella es tuornada illas muntognas tant amadas. Ed uossa co inavant? Ils uffants sun our da chasa, il dachasa üsità nun es plü, e chattar lavur cun 56 ons nun es neir bricha uschè simpel. Tras ün’amia dal Club Alpin Svizer ha ella chattà lavur i'l turissem. I tscherchaivan üna guida chi accumpogna ils turists sül Jungfraujoch ed es abla da discuorrer eir spagnöl. Nesa es ida a Barcelona per imprender spagnöl e quai es statta üna buna decisiun. Ella d’eira üna guida fich tscherchada illa lingua spagnöla. Insomma, las linguas tilla han adüna fascinada, accumpognà ed eir plaschü – Nesa discuorra rumantsch, tudais-ch, talian, spagnöl ed inglais -. Il rumantsch tilla ha dat üna basa fich buna per imprender ed eir impuonder las differentas linguas.

Dürant blers ons ha ella accumpagnà a blers turists sül Schilthorn e plü tard eir sül Jungfraujoch. Ils numerus viadis cu‘l tren sül Jungfraujoch tilla han adüna portà enorm bler plaschair e bellischems inscunters. Seis savair rich sur las montagnas – Eiger, Mönch e Jungfrau però eir sur da quellas muntognas plü pitschnas e main impreschiunantas – ed eir las differentas annectotas tilla han sgürà l’attenziun cumpletta dals aspectatuors e visitatuors. Il viadi sül Jungfraujoch es pussibel dürant tuot on. Dal 1994 ha Nesa fat üna cunvegna da surtour be amo viadis dürant la stà. Quai tilla ha dat la pussibiltà da giodair seis dachasa a Tarasp. Tarasp es adüna restà sia patria, il dachasa ed il lö da las ragischs. Eir hoz viva Nesa a Tarasp in sia bellischma chasa.

Nesa es creschüda sü immez las muntognas e quellas tillas han adüna fascinada ed atratta. Davo il divorzi, dimena cun 56 ons, ha ella chattà ün nouv hobby, il rampignar. Da rampignar il 4- o dafatta 5-avel grad nun es per Nesa ingün problem, uossa ill’ot’età dad 87 ons seguind a la guida da muntogna eir causa cha la vezzüda nun es plü uschè buna. L’ir culs skis, far gitas da skis ed ir in muntogna sun ulteriurs hobbys da Nesa. Cul club alpin dad Interlaken ha ella fat blerischmas gitas in muntogna ed imprais a cugnuoscher tras quai las muntognas da la Svizra. Però eir gitas da rampignar in Frantscha ed in Kroazia han fascinà ed’atrat a Nesa. Ün viadi inschmanchabel ha’la passantà cun amis in Patagonia. L’aventüra d’eira perfetta, organisà tuot svessa e la buscha cun tenda e damangiar per divers dis pasaiva. Quist immens grond pajais, cun muntognas otischmas, lais, glatschers e tundra han laschà inavo bleras bellas impreschiuns pro Nesa. Dad ulterius viadis in Nepal, illa Mongolia, süll' isla da Galapagos ed in America dal süd savess Nesa quintar amo bler.

Nesa es üna duonna fascinanta cun ün grondischem temparamaint, ün‘umur fich fin ed ün grond s-chazi d’istorgias. Tour pachific nun es inguotta per Nesa. Eir hoz s’inscuntra ad ella adüna darcheu culs skis sülla Motta Naluns o lura aint il üert da rampignar ad Ardez. Dimena eir cun 87 ons po esser la vita richa ed interessanta ed adüna amo plain aventüras e surpraisas.